Денес во Чаир, кандидатот за градоначалник на Град Скопје и актуелен прв човек на Општина Кисела Вода од редовите на ВМРО-ДПМНЕ, Орце Ѓорѓиевски, ги претстави проектите што, како што рече, ќе донесат суштински промени во секојдневието на граѓаните.
Најзначаен е проектот за изградба на булеварот „Цветан Димов“, кој по години одлагања конечно ќе започне да се реализира. Ѓорѓиевски потенцира дека оваа сообраќајница претставува главна артерија што ги поврзува Чаир и центарот на градот, а дневно ја користат околу 100.000 возила од општините Чаир, Бутел и Шуто Оризари.
– Со новиот булевар кој ќе има шест коловозни ленти, велосипедски патеки, тротоари, зеленило и современо осветлување ќе го решиме хроничниот хаос, но уште поважно – ќе ја зголемиме безбедноста на сите учесници во сообраќајот, изјави Ѓорѓиевски.
Тој потсети дека проектот е дел од стратегијата „Визија: Нула несреќи“, преку која до 2030 година треба да се редизајнираат 50 критични улици и крстосници во Скопје.
Покрај булеварот, започнува и изградбата на монтажна катна гаража кај ТЦ „Чаирчанка“, со цел решавање на долгогодишниот проблем со паркирањето. „Со новиот монтажен систем ќе добиеме брзо и функционално решение, со зголемен капацитет и уредено паркирање, што ќе ја растовари околината и ќе го подобри квалитетот на животот во овој густо населен дел од Чаир,“ додаде Ѓорѓиевски.
– Визијата за Скопје е еднакво развиен град, во кој секоја општина добива инфраструктура достојна за современо живеење. Само со рамномерен регионален развој Скопје може да понуди подеднакво квалитетни услови за сите, порача кандидатот на ВМРО-ДПМНЕ.
