Бранислав Светозаревиќ, носител на советничката листа на ВМРО-ДПМНЕ во општина Тетово, на вчерашниот митинг во рамки на изборната кампања под слоганот „Вистинскиот избор! Твојот човек! Твоето место! За твојата иднина!“, истакна дека идниот состав на советничката група ќе биде целосно посветен на решавање на клучните проблеми со кои се соочуваат жителите на Тетово.
Тој посочи дека општината аплицирала на вториот јавен повик за финансирање на инфраструктурни проекти од Владата со 40 проекти во вредност од 13 милиони евра, кои треба да донесат суштински подобрувања во урбаниот развој.
„Фокусот на идниот состав на советничката група на ВМРО-ДПМНЕ ќе биде насочен кон унапредување на квалитетот на живеењето во Тетово. Покрај подобрување на патната инфраструктура, приоритет ќе биде почиста и поуредна средина, решавање на сообраќајниот хаос, воведување на бесплатен јавен превоз, модерно управување со отпадот и обновување на водоводната мрежа“, изјави Светозаревиќ.
Тој најави и серија мерки за младите, меѓу кои отворање на Младински културен центар, Центар за знаење и практични вештини, како и Дигитален центар и Бизнис инкубатор каде ученици и студенти ќе можат да развиваат современи дигитални решенија.
„Со посветеност, труд и визија ќе изградиме Тетово достојно за секој негов жител. Заедно со тимот на советници, нашите коалициони партнери и поддршката од Владата и претседателот Христијан Мицкоски, верувам дека ќе успееме да го направиме нашиот град поубаво и пофункционално место за живеење“, порача Светозаревиќ.
