Во Македонија моментално се активни околу 80.000 компании, а забележлив е трендот на намалување на употребата на хартија во деловното работење, информираше денеска директорката на Централниот регистар, Анита Стамнова.
Стамнова посочи дека интересот за дигитализација кај бизнис секторот е евидентен, што се потврдува со податокот дека бројот на субјекти кои електронски поднесуваат завршни сметки е зголемен за 40 проценти.
„Имаме зголемување на бројот на отворени, наспроти затворени компании. Евидентен е интересот кај бизнисот за дигитализирано, електронско работење“, потенцираше директорката, одговарајќи на новинарски прашања.
Според неа, се повеќе се намалува тенденцијата на компаниите за работење со документи во традиционална, хартиена форма.
