Личните податоци на најмалку 17,5 милиони корисници на Инстаграм наводно протекоа и се споделени на „дарк веб“ (dark web), што предизвика сериозна загриженост за приватноста и безбедноста на платформата, јави Анадолија.
Компанијата за кибер безбедност „Malwarebytes“ соопшти дека базата на податоци вклучува кориснички имиња, целосни имиња, е-адреси, телефонски броеви и други контакт информации. Иако лозинките не се дел од протечените податоци, експертите предупредуваат дека овие информации можат да се искористат за кражба на идентитет или финансиски измами.
Упадот во податоците се поврзува со ранливост во API-системот на Инстаграм откриен во 2024 година. Хакерот под прекар „Solonnik“ ги објавил записите на форумот „BreachForums“, нудејќи ги податоците бесплатно.
Компанијата „Мета“, која е сопственик на Инстаграм, сè уште нема издадено официјално соопштение со кое би го потврдила упадот. Аналитичарите советуваат корисниците да бидат претпазливи, особено по извештаите за голем број сомнителни е-пораки за ресетирање на лозинките во неколку региони низ светот.
