Агенцијата за национална безбедност вработува инженери, со или без претходно работно искуство за плата од 50.000 до 60.000 денари во зависност од работната позиција и претходното работно искуство.
-Со овој оглас, Агенцијата отвора можност за вклучување на стручни и мотивирани инженери кои сакаат да ја градат својата професионална кариера и да придонесат во заштитата на националната безбедност. Деталните услови, критериумите и рокот за пријавување, како и потребната документација и текстот на јавниот оглас, можат да се преземат на веб-страницата на Агенцијата, во деловите „Транспарентност“ и „Кариера“, велат од АНБ.
Ова е втор јавен оглас од формирањето на Агенцијата, со што, како што велат одговорните, уште еднаш се потврдува определбата за транспарентна, отворена и законска постапка при вработување кадри.
-АНБ доследно ја применува практиката на јавно и рамноправно информирање, овозможувајќи им на сите заинтересирани кандидати кои ги исполнуваат условите да се пријават и да учествуваат во селекцискиот процес под еднакви услови, велат од Агенцијата.
Заинтересираните кандидати потребно е да пополнат пријава, да потпишат изјава за државјанство, изјава дека не е член на политичка партија, да потпише полиграфско тестирање за проверка на професионален интегритет при засновање на работен однос и согласност за полагање тест за интегритет.
