Нашиот став е јасен. Изложени сме на воена агресија. Затоа сите наши напори и сили се фокусирани на самоодбраната – рече тој, негирајќи го американскиот претседател, Доналд Трамп, кој рече дека се прифатени предлозите, објави агенцијата „Тасним“.
Багеи, на прес-конференција, потенцираше дека Иран досега немал директни преговори со САД. Тој истакна дека Иран отсекогаш ја знаел рамката што ја бара и додаде дека состаноците во Пакистан се одржуваат во рамките утврдени од самиот Пакистан, а Иран не учествува во нив.
– Иако е позитивно што земјите во регионот се заинтересирани за завршување на војната, агресорот мора да се препознае и не треба да се очекува од Иран еднострано да покаже воздржаност. Иран е нападнат, а не иницијатор – рече тој.
Војната на САД и Израел во Иран влезе во вториот месец, а според она што го кажале разузнавачки извори за „Ројтерс“, не е точно тврдењето на Трамп дека Иран има „многу малку ракети“, како ни процените на некои американски претставници дека програмата за балистички ракети на Иран е речиси неутрализирана.
Напротив, соговорниците на „Ројтерс“ проценуваат дека се уништени околу една третина од ракетите, додека една третина, веројатно, се оштетени или скриени во подземни тунели и бункери. Слична процена важи и за иранските беспилотни летала. Тоа значи дека иако многу од ракетите моментално не се достапни за употреба, Иран сè уште има значителни резерви.
