Можност за реализација на јавни инвестиции во вредност од 3,3 милијарди евра во наредните пет години беше презентирана на седница на Комитетот за јавни инвестиции, новоформирано тело кое ќе ги селектира и следи капиталните проекти од стратешко значење.
Премиерот Христијан Мицкоски истакна дека со ова започнува нова пракса во управувањето со јавните инвестиции, преку воведување алатка за следење на нивната реализација.
„Вкупната вредност е 3,3 милијарди евра за следните пет години, при што најголемиот дел се однесува на проекти во градежништвото, со над 600 милиони евра годишно. Ќе мора да се мобилизираме за нивна реализација. Владата ќе обезбеди финансирање, но растот на БДП ќе зависи и од ефикасноста на изведувачите“, нагласи Мицкоски.
Министерката за финансии Гордана Димитриеска-Кочоска појасни дека ќе се воведе нов модел на одлучување за капитални проекти со вредност над пет милиони евра, со цел поголема транспарентност и подобро буџетско планирање.
Таа истакна дека станува збор за проектни идеи кои допрва ќе се оценуваат, а не за веќе финансирани проекти, при што Комитетот – составен од сите министерства – ќе одлучува кои од нив се приоритетни и изводливи, во согласност со буџетските можности.
Според премиерот, разгледуваната листа е резултат на координиран институционален пристап и опфаќа клучни сектори. Во транспортот се планира модернизација на железницата, набавка на нови локомотиви и реконструкција на делници, како и поврзување преку Corridor 8 и Corridor 10.
Во образованието се предвидени инвестиции за доизградба на ФИНКИ, Факултетот за физичко образование, спорт и здравје и Универзитет „Мајка Тереза“. Во здравството, фокусот е ставен на регионалните клинички болници во Тетово, Штип и Кичево.
Дигиталната трансформација ќе се реализира преку воспоставување владин податочен центар, зајакната мрежна инфраструктура и кибербезбедност, со цел поефикасна администрација. Во земјоделството и водостопанството, инвестициите ќе опфатат системи како Злетовица и Стрежево, како и ревитализација на водните ресурси.
Во енергетиката, преку проектите на АД ЕСМ, се предвидува зајакнување на енергетската независност преку нови капацитети, обновливи извори и модернизација на постојната инфраструктура.
Комитетот за јавни инвестиции е формиран согласно Законот за буџетите и работи врз основа на уредбата за управување со јавни инвестиции, со цел воспоставување поефикасен и отчетен систем за трошење на јавните средства.
