Синот на норвешката престолонаследничка принцеза, Мариус Борг Хеиби, мора да го одлежи остатокот од својот притвор зад решетки, пренесе ДПА.
Весникот „Нетависен“ денеска објави дека Највисокиот суд на Норвешка ја одбил жалбата на 29-годишникот против одлуката со која му се ускратува дозволата да ја чека пресудата дома под електронски надзор.
Пресудата од судењето се очекува на 15 јуни.
Хеиби, кој е обвинет за низа сериозни кривични дела вклучувајќи и силување, сакаше времето до тогаш да го помине во својот стан во резиденцијата на престолонаследникот Хаакон и принцезата Мете-Марит.
Хеиби е во притвор откако почна судењето на почетокот на февруари. Претходното барање за ослободување веќе беше одбиено од судот поради „сериозноста и обемот на случајот, како и високиот ризик од повторување на делото“.
Судењето на 29-годишникот заврши кон крајот на март. Хеиби се соочува со 40 обвиненија. Половина од нив се однесуваат на однесувањето на Хеиби кон млада жена со која бил во врска од 2023 година.
Тој призна дека бил насилен кон својата тогашна девојка под дејство на алкохол и кокаин и дека уништувал предмети во нејзиниот стан.
Хеиби е исто така обвинет за четири дела на силување. Тој се товари дека ги снимал наводните жртви за време на инцидентите.
Хеиби, кој е син на Мете-Марит од врска пред нејзиниот брак во 2001 година со престолонаследникот, доследно ги негираше обвиненијата за силување.
Обвинителите побараа затворска казна од седум години и седум месеци. Адвокатите на одбраната на Хеиби, пак, бараа затворска казна од една и пол година. Неговите адвокати тврдеа дека тој треба да биде ослободен од обвиненијата за силување.
