Американскиот претседател Доналд Трамп денес го прославува својот 80. роденден со несекојдневен настан – UFC борби кои ќе се одржат на тревникот пред Белата куќа. Според германската агенција ДПА, од 20 часот по локално време организацијата UFC ќе приреди седум борби во октагон поставен на јужниот тревник на Белата куќа.
Специјално подготвената арена е опкружена со седишта за повеќе од 4.000 гледачи и покриена со огромна купола. Во блискиот парк Ellipse се одржува и фестивал за навивачи, каде што организаторите очекуваат повеќе од 120.000 посетители.
Иако официјално настанот е дел од програмата за одбележување на 250-годишнината од американската независност, која традиционално се слави на 4 јули, критичарите сметаат дека станува збор за политички и медиумски спектакл поврзан со роденденот на Трамп. Неколку иницијативи безуспешно се обидоа по судски пат да го спречат настанот. Тие тврдат дека на UFC и на нејзиниот претседател долгогодишен сојузник на Трамп, им е овозможено да го користат просторот на Белата куќа за промоција на приватен и профитен спортски настан.
Во меѓувреме, движењето „No Kings“, кое се противи на Трамп, организира паралелни собири низ САД. Наместо класични протести на улиците, поддржувачите се повикани да следат концерт во Њујорк посветен на Првиот амандман на американскиот Устав и слободата на говор, медиуми и јавно собирање. Настанот пред Белата куќа претставува еден од најневообичаените спортско-политички спектакли организирани во американската престолнина во последните години.
