Управата за јавни приходи (УЈП) ги потсетува засегнатите даночни обврзници дека на 30 јуни 2026 година истекува рокот за поднесување на првите даночни пријави за 2024 година согласно Законот за минимален глобален данок на добивка и Правилникот за начинот на пресметување и наплата на дополнителниот данок на добивка.
Како што соопшти УЈП, Законот предвидува мерки со кои се обезбедува минимално ефективно оданочување на добивката на мултинационални групи на компании и големи домашни групи, со минимална даночна стапка од 15 проценти.
Законот се однесува на составни субјекти со седиште во државата кои се дел од мултинационални или големи домашни групи, чиј годишен приход во консолидираните финансиски извештаи на крајната матична компанија во најмалку две фискални години во периодот од 2020 до 2023 година изнесувал најмалку 750 милиони евра.
Според законските одредби, минималното ефективно оданочување се обезбедува преку три механизми: правилото за квалификуван домашен дополнителен данок, правилото за вклучување на добивката и правилото за помалку оданочена добивка.
УЈП информира дека засегнатите даночни обврзници најдоцна до 30 јуни треба електронски да достават известување за субјектот назначен за поднесување на Пријавата за информации за дополнителен данок, како и Пријава за квалификуван домашен дополнителен данок (образец КДДД/П).
Известувањето е достапно на веб-страницата на УЈП, а пополнетиот образец треба да се испрати електронски на адресата Kontakt_Centar@ujp.gov.mk.
Дополнително, до 30 јуни треба да се поднесе и Пријавата за информации за дополнителен данок преку системот е-Даночни услуги, во делот „Извештај за глобален данок“.
Пријавата за квалификуван домашен дополнителен данок (КДДД/П) се поднесува најдоцна до 30 јуни, додека Пријавата за дополнителен данок (ДДД/П) треба да се достави најдоцна до 30 јули 2026 година.
Од УЈП посочуваат дека даночните пријави мора да се поднесат и во случај кога пресметаниот данок за плаќање изнесува нула.
Рокот за плаќање на квалификуваниот домашен дополнителен данок е 30 јули 2026 година, додека дополнителниот данок на добивка треба да се плати најдоцна до 30 август 2026 година.
