Крајнодесничарската Алтернатива за Германија – АфД (AfD) за првпат се најде на врвот на популарноста во земјата во национална анкета, со 27 проценти поддршка, додека истовремено незадоволството на граѓаните од работата на владејачката коалиција расте, покажа денеска најновото истражување на јавното мислење од агенцијата ЈуГов (YouGov).
Според анкетата, Алтернативата за Германија освои 27 проценти поддршка, што е за еден процентен поен повеќе од претходниот месец, со што ги престигна сите други политички партии, пренесува Дојче Веле (DW).
Конзервативниот блок на Христијанско-демократскиот сојуз на Германија и Христијанско-социјалниот сојуз на Баварија (ЦДУ/ЦСУ) забележа пад од три процентни поени на 23 проценти, што е најнизок резултат во оваа анкета од крајот на 2021 година.
Социјалдемократската партија на Германија (SPD) падна на 13 проценти поддршка, додека Зелените и Левицата забележаа мал раст од по еден процентен поен, достигнувајќи 14 и 10 проценти, соодветно.
Слободната демократска партија (ФДП), која ги претставува интересите на бизнис-заедницата, како и популистичко-левичарскиот сојуз –БСВ (BSW), имаат по четири проценти поддршка, што е под изборниот праг за влез во парламентот.
Дојче Веле оценува дека истражувањето укажува и на растечкото незадоволство на граѓаните од работата на владата, бидејќи 79 проценти од испитаниците рекле дека не се задоволни од сегашната коалиција, што е значително зголемување во споредба со 55 проценти во средината на 2025 година.
Други неодамнешни анкети на јавното мислење укажуваат на потесна трка, а анкетите на Инса (Insa) и Инфратест димап (Infratest dimap) исто така покажуваат дека АфД има мала предност или е на нивото со блокот ЦДУ/ЦСУ, потврдувајќи го променливото расположение на гласачите во Германија
