Банкарската 2024 та ќе заврши со олеснување на условите за кредитирање и зголемена побарувачка на кредити и од граѓаните и од компаниите. Просечната камата за новоодобрените кредити за фирмите, по една година, за прв пат се намали под 5%, пишува Порталб.мк. Новата Анкета на НБМ покажува дека во последниот квартал банкарите очекуваат тренд на натамошно олеснување на условите за кредитирање. Заклучно со октомври фирмите и граѓаните на банките должат 7,7 милијарди евра што претставува годишен раст од 9,2%.
Кредитирање на компании
“За кредит од 10 000 евра до 3,5 милиони евра, со рок на отплата до 8 години, камата од 5,5%“
Ова е едена од понудите на банките за кредитирање на компании. “Порталб“ направи увид во веб-страните на неколку познати банки, какви услови, односно камати и рокови, нудат за кредитирање. Дел од банките транспарентно ги објавуваат, но дел од банките не објавуваат податоци за каматите во делот на кредитирање на правни лица.
Со каков каматен и кредитен тренд ќе заврши оваа година? Според новата Анкета на НБМ, во овие последни три месеци од 2024 та побарувачката за кредити од страна на компаниите ќе се зголеми а каматите ќе се намалат. Ваков тренд очекуваат банкарите од големите и од средните банки, додека од малите банки најавуваат непроменети услови за кредитирање.
“За четвртиот квартал од 2024 година, банките очекуваат засилено нето-зголемување на кредитната побарувачка од страна на претпријатијата“ – се наведува во Анкетата на НБМ.
Камати за компании
Септември 2023 Септември 2024
Вкупни кредити 5,37% 5,15%
Новоодобрени кредити 5,30% 4,78%
Каматата за новоодобрените кредити за компаниите, втор пат годинава ( прв пат во март), во септември се спушти под 5% додека просечната камата на вкупните кредити за компаниите изнесувала 5,15%, и е на најниско ниво од септември 2023 та година.
Најновите податоци од НБМ покажуваат дека на крајот од октомври компаниите на банките по основ на кредити должеле 3,74 милијарди евра, сума која на годишно ниво е зголемена за 10,4% и е највисок годишен раст во текот на оваа година.
Кредити за домаќинства
Пониски камати и провизии за станбени кредити, зголемена побарувачка за потрошувачки кредити. Овој тренд во третиот квартал од годинава се очекува да се одржи до крајот на 2024.
Камати за домаќинства
Септември 2023 Септември 2024
Вкупни кредити 5,61% 5,66%
Новоодобрени кредити 5,47% 5,27 %
Според податоците од НБМ, просечната камата на вкупните кредити за домаќинствата заклучно со септември изнесувала 5,66% и за разлика од каматите за фирмите, таа е зголемена за 0,05 пп на годишна основа. Но, новоодобрените кредити се нудат со камата која е пониска на годишно и на месечно ниво. Банките веќе нудат долгорочни кредити со фиксна камата во период и до 10 години, што се смета за сигнал дека може да се очекува натамошно олабавување на кредитните услови во делот на каматната политика. Еве дел од понудите на банките :
“За кредит до 25 000 евра, со рок на отплата до 10 години , камата од 5% до 5,2 % во зависност од видот на осигурувањето“
“Станбен кредит со камата до 150 000 евра со рок на отплата од 50 години и фиксна камата од 3,45% во првите пет години и фиксна камата од 3,90% во период од 10 години“
Банкарите со различни проценки за тоа какви ќе бидат кредитните услови за домаќинствата до крајот на годинава. Така менаџерите на големите банки очекуваат олеснување на кредитните услови и зголемување на побарувачката на кредити, банкарите од средните банки најавуваат дека нема да има промена во условите за кредитирање додека пак оние од малите банки дури најавуваат и заострување.
“Очекувања за четвртиот квартал на 2024 година: нето-олеснување на кредитните услови, при нето-зголемување на побарувачката на кредитите на домаќинствата“ – се наведува во Анкетата.
На крајот на октомври вкупната кредитна задолженост на домаќинствата во банките изнесувала 3,98 милијарди евра со раст од 8,2% на годишно ниво.
