Земјите-членки на Европската унија (ЕУ) денеска гласаа за воведување царини за електричните автомобили увезени од Кина, и покрај противењето на Германците кои стравуваат од трговска војна со Пекинг.
Европската комисија (ЕК) сега има одврзана рака да додаде до 35 отсто на данокот од 10 отсто, кој е веќе на сила, за електричните возила од кинеско производство.
Тие давачки треба да стапат на сила на крајот на октомври. Целта на одлуката, според АФП, е повторно да се воспостават фер услови на конкуренција со кинеските производители кои добиваат субвенции од државата.
Во соопштението за медиумите, Европската комисија ја поздрави денешната одлука, која „ја доби потребната поддршка од земјите-членки“. ЕК, исто така, нагласува дека Брисел и Пекинг го продолжиле дијалогот за да се обидат да најдат решение преку преговори.
Кина, меѓутоа, го осудува пристапот, кој го смета за протекционистички, а веќе реагираше со покренување истрага за прехранбените и алкохолните производи што ги увезува од ЕУ.
Кинеската стопанска комора во ЕУ изрази „длабоко разочарување“ по гласањето во Брисел и ја повика Европската унија „да го одложи спроведувањето на царините и да му даде приоритет на дијалогот“.
Германија, заедно со Унгарија, Словачка, Словенија и Малта, гласаа против даночниот план на Комисијата, но не успеаја да го соберат потребното мнозинство за негово поништување, пишува Франс прес.
Тарифите беа поддржани од десет земји-членки, вклучувајќи ги Франција, Италија и Полска. Дванаесет други беа воздржани, вклучително и Шпанија и Шведска, кои сепак го изразија своето незадоволство.
Унгарскиот премиер Виктор Орбан изјави дека Европската унија ризикува да влезе во „економска студена војна“ со Кина.
„Она што не принудуваат да го направиме, она што го прави Европската унија е економска студена војна. Тоа е најлошото нешто што може да и се случи на Европа. Ако вака продолжи, европската економија ќе умре“, рече Орбан.
Во јули, ЕУ воведе привремени царини до 37,6 отсто за електричните возила произведени во Кина. Како одговор, Пекинг поднесе жалба до Светската трговска организација во август, велејќи дека тарифите ги прекршуваат правилата на организацијата и ја поткопуваат глобалната соработка за климатските промени.
Кина, исто така, започна истрага за извозот на француски коњак, свинско месо и млечни производи од ЕУ. Истрагите ги зголемија стравувањата од трговска војна.
