Израелската армија објави снимка од операција за која вели дека била една од најкомплексните во историјата на Израел.
Во ноќта на 8 септември, стотина елитни израелски командоси во четири хеликоптери полетале од непозната база. Нивната дестинација била планина во областа Масјаф во западна Сирија, на приближно 200 километри од северната граница на Израел, пренесува The Telegraph.
Хеликоптери со војници од специјалната единица Шалдаг летале исклучително ниско над Средоземното Море за да ја избегнат воздушната одбрана и радарите на режимот на Асад додека го преминаа Либан и навлегоа во Сирија.
Во исто време, израелски воени авиони, поморски ракетни бродови и беспилотни летала започнале голем бран напади врз целта – иранска ракетна фабрика закопана во голема планина. Командосите ја започнале операцијата на терен. Околу 30 сириски војници и чувари биле убиени пред командосите да упаднат во подземниот објект, кој бил под строг надзор на израелското разузнавање од 2017 година.
Комплексот, кој ИДФ го нарекува Длабок слој, се наоѓа на длабочина од 70 до 130 метри под земја и е речиси невозможно да се уништи со воздушни напади.
Според ИДФ, тоа бил објект од критично значење за Иран. Имало „напредни производствени линии дизајнирани да произведуваат стотици проектили со прецизно наведување и долг дострел и ракети со краток дострел“.
Во моментот на нападот, објектот се уште не бил целосно завршен, првите ракети веќе биле произведени, а ракетните мотори масовно се произведувале, објави ИДФ. По обезбедувањето на објектот, командосите тргнале во двојна мисија: собирање разузнавачки информации и уништување на локацијата.
Војниците упаднаа во огромниот комплекс користејќи експлозиви и вилушкари за да ги уништат тешките врати. Снимката од камерите на телото на командосите покажува како тие поминуваат низ лавиринт од ходници, каде што наоѓаат автомобили, машини за производство на ракетни делови, купишта документи, ракетни мотори…
Откако ги собрале сите можни разузнавачки информации, командосите поставиле 300 килограми експлозив подготвен за далечинско детонирање. Штом војниците се вратиле во хеликоптерот, бомбите биле активирани.
Целата акција траела вкупно три часа, а се подготвувала седум години. Се смета за една од најкомплексните во израелската историја и вклучува 21 борбен авион, 14 транспортни авиони, пет беспилотни летала и шест хеликоптери.
„Ова беше една од најважните превентивни операции што ги презедовме против напорите на иранската оска да се вооружи за да нѐ нападне. Тоа сведочи за нашата храброст и одлучност да дејствуваме насекаде за да се браниме“, изјави Бенјамин Нетанјаху, премиер на Израел.
