Дејвид Линч, американски режисер, писател и уметник кој освои номинации за Оскар за најдобар режисер за филмовите „Син сомот“, „Човекот слон“ и „Малхоланд Драјв“, како и еден од сценаристите на револуционерната телевизиска серија „Твин Пикс“ почина непосредно пред својот 79-ти роденден, објави неговото семејство во четвртокот.
„Со длабока тага ние, неговото семејство, ја објавуваме смртта на овој човек и уметник Дејвид Линч“, се вели во соопштението на фејсбук-страницата на Линч.
„Сега, кога тој повеќе не е со нас, остана голема празнина во светот. Но, како што би рекол и самиот, важна е крофната, а не дупката“.
Со своите визуелно зачудувачки, вознемирувачки и неразбирливи дела полни со сцени слични на соништата и бизарни слики, Линч важеше за мајстор на надреализмот и еден од најиновативните филмаџии на неговата генерација.
Тој ја доби почесната награда на Академијата за животно дело за 2019 година.
Загадочниот уметник и приврзаник на трансценденталната медитација се спротивстави на објаснувањето на неговите сложени филмови, вклучително и „Диви во срцето“, добитник на Златната палма во 1990 година на Канскиот филмски фестивал, „Eraserhead“, хорор од 1977 година и трилерот „Изгубениот пат“ од 1997 година.
„Филм или слика е секој посебен јазик, па не вреди да се обидуваме да го кажеме истото со зборови. Нема зборови“, изјави тој за весникот The Guardian во интервју во 2018 година.
Неговиот стил на снимање изведе нова придавка – „линчовски“, која магазинот Vanity Fair го опиша како чуден, морничав и бавен. Линч во своите филмови го вметнува морничавото и вознемирувачкото во обичното и секојдневното, а впечатокот дополнително го засилува со музиката.
Режисерот велеше дека не го интересира само приказната, туку и атмосферата на филмот поставена од комбинираното дејство на визуелни и аудитивни елементи.
„Неговото око за апсурдни детали што предизвикуваат сцена во шокантно олеснување, и неговиот вкус за ризичен, често гротескен материјал, го направија можеби најпочитуваниот ексцентрик во Холивуд, еден вид психопат Норман Роквел“, објави The New York Times во 1990 година во пресрет на прваета сезона на „Твин Пикс“.
