Основното јавно обвинителство Скопје и полициски екипи започнаа увид во зградата на улицата „Прохор Пчињски“ во Чаир, каде на 2 октомври избувна пожар во подрумските простории на зградата. Според МВР, истраги се вршат бидејќи Секторот за внатрешни работи Скопје претходно ги завршил сите подготовки и овозможил пристап до овој објект. Од полицијата информираат дека пристапот до објектот се контролира строго и најпрво во присуство на сопствениците на становите се врши евиденција на предметите и штетите предизвикани на становите. Според полицијата се уште се обезбедуваат подрумските простори од каде според првичните информации настанал пожарот за пристап и испитување на причините. Од МВР најавија и дека времетраењето на истражните дејствија на терен ќе зависи од времето потребно за прибирање на сите докази.
Од друга страна, голем дел од семејствата кои живеат во оваа зграда веќе почнаа да се соочуваат со бројни потешкотии околу сместувањето и обезбедувањето на нивната материјална егзистенција. Впрочем, на социјалните мрежи Советот на зградата апелира до добротворните организации кои имаат можност да ги сместат семејствата погодени од пожарот и да им олеснат по несреќата. Според Советот, во оваа зграда има семејства социјални случаи, деца без родители и болни лица.
На 2 октомври избувна пожар во подрумските простории на зградата при што е причинета голема материјална штета. Пожарот кој продолжи да биде активен 30 часа зафати десетици станови во оваа зграда. Евакуирани беа 35 семејства. Голем дел од жителите поради вдишување на чад побараа лекарска помош, а меѓу нив имаше и пожарникари. Лекарска помош побараа 43 лица, од кои 12 деца.
