Вработените во „Фолксваген“ ќе започнат предупредувачки штрајкови во понеделник во погоните низ Германија, соопшти синдикатот ИГ Метал, што го означува првото големо запирање во домашните операции на „Фолксваген“ од 2018 година. Почетокот на штрајковите претставува натамошна ескалација на спорот меѓу водечкиот европски производител на автомобили и неговите работници поради масовни отпуштања, намалувања на платите и можно затворање на погоните – драстични мерки што компанијата вели дека не може да ги исклучи поради кинеската конкуренција и ладењето на побарувачката на потрошувачите.
Претставниците на работниците во VW на 22 ноември гласаа за ограничени штрајкови во германските операции од почетокот на декември, откако разговорите за платите и затворањето на фабриките не успеаја да постигнат пробив. „Доколку е потребно, ова ќе биде најтешката битка за колективно договарање што ‘Фолксваген’ некогаш ја видел“, рече во изјавата преговарачот на ИГ Метал, Торстен Грогер. Производителот на автомобили рече дека продолжува да се потпира на конструктивен дијалог за изнаоѓање одржливо решение. „’Фолксваген’ го почитува правото на вработените да учествуваат во предупредувачки штрајк“, рече портпаролот како одговор на соопштението на синдикатот, додавајќи дека компанијата однапред презела чекори за да обезбеди основно ниво на снабдување на клиентите и да го минимизира влијанието на штрајк. Предупредувачките штрајкови во Германија обично траат по неколку часа.
Синдикатот минатата недела предложи мерки за кои рече дека ќе заштеди 1,5 милијарди евра, вклучително и откажување од бонуси за 2025 и 2026 година, што најголемиот европски производител на автомобили ги отфрли.
„Фолксваген“ побара намалување на платите за 10%, тврдејќи дека треба да ги намали трошоците и да го зголеми профитот за да го одбрани пазарниот удел наспроти евтината конкуренција од Кина и падот на европската побарувачка за автомобили.
Компанијата се заканува да ги затвори погоните во Германија за прв пат во својата 87-годишна историја. (Ројтерс)
