На гостувањето на поткастот „ВМРО-ДПМНЕ Зборува“, пратеникот на ВМРО-ДПМНЕ, Бојан Стојаноски го пофали договорот на Владата за покачување на платите во здравството, бидејќи како што вели тој, сега Владата има слух за барањата и ги решава проблемите.
-Јас сум многу задоволен кога ќе ги видам и претставниците на синдикалните здруженија кога ќе ги пофалат одредени потези на Владата, бидејќи во минатото многу често нив ги гледавме во улога пред Владата на протести барајќи си ги своите основни права. А, впрочем ние и за тоа ја добивме власта, тоа го понудивме на граѓаните и затоа победивме, потенцираше Стојаноски.
Пратеникот посочи дека опозицијата, кога била власт, не нашла начин и по седум години владеење, да ги зголеми платите на полицијата, армијата и администрацијата, а сега преку амандмани барале покачување на истите, без да проверат во буџетот дека ќе се зголемат платите во овие сектори.
-Пораснаа платите во образованието, пораснаа во здравството, ќе се покачат и на полицијата, во армијата целосно се почитува колективниот договор. Исто така има предвидено средства и за покачување на минималната плата и за покачување на платите и во државниот и приватниот сектор, појасни Стојаноски.
