Претседателот на Демократската унија за интеграција, Али Ахмети, во својот говор во Чаир, се осврна на тврдењата на одредени политичари дека Албанците наводно сакаат да ја поделат Македонија. Тој категорично ги отфрли овие обвинувања, нагласувајќи дека таква намера никогаш не постоела.
„Ние сакаме унитарна и рамноправна држава за сите, а не тиранин за едни,“ изјави Ахмети, според медиумите на албански јазик во земјата.
На партискиот настан во Чаир, Ахмети, заедно со кандидатите за градоначалници Бујар Османи и Скендер Реџепи – Зејд, го потпиша таканаречениот „Закон за Чаир“. Според него, овој чин го симболизира најголемото национално единство од 2001 година.
„Сите се обединети, како и порано, за да го вратат достоинството, да ја вратат честа, да ги заштитат достигнувањата. Тогаш борбата беше да се добие еднаквост, денес е да се заштити. Заедно да се стави крај на дискриминацијата, понижувањето, лошото управување. Сенародното движење на отпор и надеж станува сè посилно и поинклузивно секој ден! Сите на нозе, подготвени за октомврискиот референдум,“ порача Ахмети од скопската општина.
