Демократска унија за интеграција тврди дека е мета на политички притисок од власта бидејќи, како што велат оттаму, во континуитет се таргетираат поранешни градоначалници од редовите на ДУИ, како Блерим Беџети од Сарај и Фатмир Дехари од Кичево. Реакцијата на партијата се однесува откако против двајцата ексградоначалници изминатиот период беа поднесени неколку кривични пријави.
„ДУИ не е против институционален надзор и ревизија, но силно се спротивставува на политичкиот притисок и политизираниот пристап. Ние сме за контрола и транспарентност, но не и за селективна и политички мотивирана правда, како што се случува со случаите во Сарај и Кичево“,порачаа од ДУИ.
Во рамките на четвртата седница на Генералниот совет на ДУИ, свикана од лидерот Али Ахмети, меѓу другото, се дискутирало за политичката состојба во земјата. Во оваа смисла било посочено дека постојат тенденции за нарушување на Охридскиот мировен договор, што би довело до последици за стабилноста на земјата.
„Бараме од иницијаторите и спроведувачите на овие дејствија да се повлечат од истите и да се продолжи со целосно почитување на Охридскиот мировен договор, како единствен пат кон стабилност и напредок на земјата кон целосно членство во Европска Унија“,велат од ДУИ.
Освен за политичката состојба во државата, на седницата на ДУИ станало збор и за случувањата во регионот и пошироко. Во оваа смисла било посочено дека последните избори во Унгарија, на кои се прекина долгогодишното владение на Виктор Орбан, ќе влијаат и врз Западен Балкан.
