Пратеникот од ВМРО-ДПМНЕ, Бране Петрушевски, преку објава на социјалните мрежи порача дека тужбата за клевета, како што наведува, „нема да ја сокрие вистината“, алудирајќи на поранешниот премиер Зоран Заев.
Во својата објава, Петрушевски истакнува дека завршиле времињата кога, според него, од позиција на власт се вршеле притисоци врз судии и обвинители и се „нарачувале пресуди“, објави 4news.mk Тој наведува дека денес институциите треба да постапуваат согласно законите, а не под политички влијанија.
Пратеникот посочува дека стои зад секој јавно изнесен збор и изразува подготвеност аргументите да ги соочи на суд, но и пред јавноста. Според него, судницата не треба да биде средство за заплашување, туку место каде што се утврдува вистината.
Во објавата се додава дека никој не е над законот, без разлика дали станува збор за поранешен премиер или актуелен пратеник. Петрушевски упатува повик, наместо преку тужби да се замолчува критиката, да се одговорат прашањата што, како што наведува, ја интересираат јавноста.
„Вистината секогаш излегува на виделина“, порачува Петрушевски во својата објава.
