Здружението „16-ти Март 2025 – Кочани“ побара одговори од институциите за реализацијата на спомен-обележјето во чест на жртвите од трагедијата во „Пулс“.
Тие потсетуваат дека лани во Собранието беше прифатен амандман со кој беа обезбедени два милиони денари за подготовка и почеток на активности за изградба на меморијалот, но на средба со министерот за култура им било кажано дека средствата биле пренаменети за други цели.
Според изјавите на министерот Зоран Љутков, за 2026 година повторно се предвидени два милиони денари за оваа намена и веќе се работи на основниот проект.
Од здружението прашуваат дали е донесена новата прераспределба на средства, кога тие ќе бидат ставени на располагање и кога ќе започне реализацијата на спомен-обележјето.
„Спомен-обележјето не е само проект. Тоа е место на сеќавање, достоинство и траен однос кон 63 прекинати животи“, порачаа од здружението.
