Србија ќе ја намали стапката на акцизата на нафтените деривати за дополнителни 40 проценти, за да се ублажи ценовниот шок на бензинските пумпи, изјави денеска претседателот на државата, Александар Вучиќ, по седницата на Советот за национална безбедност.
Пред една недела, Србија веќе ги намали акцизите за нафтените производи за 20 проценти, што, според Вучиќ, ја чинело државата 35 милиони евра месечно. Тој откри дека земјата лани собрала околу две милијарди евра од акцизата на нафтените деривати.
Со ова намалување на акцизата, уделот на давачките кон државата во цената на литар гориво се спушти под половина од крајната, малопродажна цена.
Горивата во Србија, кои и пред тоа беа меѓу поскапите во регионов, дополнително поскапеа од почетокот на месецов и избувнувањето на кризата на Блискиот Исток, која предизвика проблеми во снабдувањето во поголемиот дел од светот.
Со новото намалување на акцизата, литар бензин од 98 октани ќе чини 188 динари (околу 1,60 евра), додека евродизелот ќе се продава за 212 динари (околу 1,80 евра). Ова се највисоките цени од јануари 2025 година, кога Нафтена индустрија на Србија (НИС), најголемата нафтена компанија во земјата, беше ставена под санкции од Соединетите Американски Држави поради нејзиното мнозинско руско сопствеништво, потсетува Радио Слободна Европа.
