Романскиот парламент изгласа недоверба на владата на премиерот Илија Болојан, со што ја собори проевропската влада и отвори нова политичка криза во земјата, објави Диги24.
Падот на владата доаѓа во чувствителен момент, со предупредувања дека политичката нестабилност може да го загрози кредитниот рејтинг на земјата, пристапот до фондовите на Европската унија и стабилноста на националната валута.
Болојан ја предводи малцинската влада од крајот на април, откако Социјалдемократите (ПСД), најголемата партија во парламентот, ја повлекоа поддршката и ја напуштија четирипартитната проевропска коалиција. Потоа тие се здружија со опозицијата, вклучувајќи ги и крајно десничарските сили, за да покренат предлог за недоверба.
Иако засега не се очекуваат предвремени избори, финансиските пазари веќе реагираа. Романската валута, леа, падна на рекордно ниско ниво во однос на еврото пред гласањето , додека инвеститорите стравуваат дека политичката криза би можела да го забави намалувањето на буџетскиот дефицит, најголем во Европската Унија.
Сегашната коалиција беше формирана пред десет месеци за да се спротивстави на подемот на крајната десница по серијата поларизирани избори. Владата успеа да почне да го намалува дефицитот и да избегне намалување на кредитниот рејтинг, но мерките за штедење предизвикаа сериозен политички конфликт.
Пред гласањето, Болојан ги предупреди пратениците за последиците од политичката нестабилност.
„ Може ли некој да ми каже како ќе функционира Романија од утре, дали имате план? “, рече тој.
