Утре со почеток во 12.05 минути на Градскиот плоштад во Скопје, ќе се одржи „Марш за ангелите“ во организација на семејствата на починатите и повредените од пожарот во дискотеката „Пулс“ во Кочани.
Од Плоштадот поворката ќе тргне кон Собранието, а маршот ќе заврши пред зградата на Основниот кривичен суд.
Ова е вкупно 30ти „Марш за ангелите“ и истовремено прв што ќе се одржи по улиците на Скопје.
Пред маршот, родителите упатија порака и повик за поддрша од сите граѓани.
„Не бараме милост, туку вистина и правда. Болката е наша, но борбата е за сите нас. Ни треба вашата поддршка.“ се вели во нивната видео порака.
Истовремено, вчера од страна на иницијативата „Кој е следен?“ со герила акција на скопскиот плоштад ги повикаа сите граѓани на Скопје да се приклучат на Маршот.
„Македонија има совест. Корупцијата им ги одзеде животите на овие деца, а нашата должност е да не молчиме. Болката е нивна, но борбата е заедничка.“ порачаа од иницијативата „Кој е следен?“
Тие дополнуваат дека трагедијата во Кочани не смее да се третира како локален инцидент, туку како општествен повик за обединување и отпор кон системските пропусти.
Првото судско рочиште е закажано за 19 ноември. Според обвинителниот акт, 34 физички и 3 правни лица се товарат за тешки дела против општата сигурност, а процесот ќе го води тим од околу 15 обвинители, најави државниот јавен обвинител Љупчо Коцевски.
