Петре Шилегов, најави дека во партијата се подготвува платформа со која ќе се побараат сериозни реформи и одговорност од актуелното раководство.
„Жално е тоа што му се случува на СДСМ. Кадровски сериозно е испразнет. Луѓето што можеа да помагаат, а се СДСМ, очигледно е дека не се пожелни. Сите не дочекаа на нож затоа што укажавме дека начинот на раководење со партијата во последните неколку години ја носи на прагот на политичка егзистенција“, рече Шилегов.
Тој посочи дека изборните резултати покажуваат сериозен пад на поддршката, наведувајќи дека СДСМ во Скопје станал петта политичка сила, а во градови како Битола, Прилеп, Велес и Штип трета.
Шилегов ги отфрли обвинувањата дека со своите ставови работи во корист на владејачката ВМРО-ДПМНЕ, нагласувајќи дека неговиот ангажман е исклучиво насочен кон зајакнување на СДСМ.
„Не може да се случи да работам за ВМРО-ДПМНЕ. Тоа што го правам можам да го правам само за СДСМ“, истакна тој.
Говорејќи за начинот на кој ќе се изрази незадоволството во партијата, Шилегов рече дека процесот е веќе активен и дека постои поголема група социјалдемократи кои не се согласуваат со начинот на кој се води партијата.
„Ќе се обидеме да дојдеме до здрава политичка логика и да ги замолиме луѓето што ја раководат партијата тоа повеќе да не го прават. Да дојдат други луѓе што ќе ја раководат“, рече тој.
