Биткоинот го достигна својот највисок историски рекорд, надминувајќи ја вредноста од 125.000 долари за прв пат, со што ја потврди доминацијата на крипто пазарот по повеќе од една деценија.
Според податоците на CoinGecko, цената на најголемата криптовалута скокна на нов максимум за време на азиското тргување, со дневен промет од речиси 50 милијарди долари.
Истовремено, повеќе од 200 милиони долари „кратки позиции“ беа принудно затворени во последните 24 часа, откако инвеститорите кои се обложија на пад на Биткоинот мораа да купуваат за да ги покријат своите загуби. Според CoinGlass, ова дополнително го засили растот на цената, создавајќи синџирна реакција на купување.
Аналитичарите посочуваат дека комбинацијата на поволни економски услови, институционален интерес и зголемена побарувачка за безбедни средства придонесоа за овој рекорден скок. Само во изминатата недела, вредноста на Биткоинот порасна за 14 проценти.
Како што наведува CNBC, кризата околу федералниот буџет во САД и затворањето на владините служби ги натера инвеститорите да побараат засолниште во децентрализираните финансиски системи.
„Затворањето е клучен фактор овој пат. За разлика од 2018 година, Биткоинот сега има поинаква улога на глобалниот пазар,“ изјави Џеф Кендрик од Standard Chartered Bank, додавајќи дека движењето на Биткоинот сè повеќе се усогласува со ризиците поврзани со американската економија.
Банката Standard Chartered очекува криптовалутата наскоро да достигне 135.000 долари, доколку трендот продолжи со исто темпо.
Покрај Биткоинот, и златото бележи раст – цената на спот пазарот се зголеми за 0,5% на 3.876 долари за унца, додека индексите S&P 500 и Nasdaq Composite во петокот завршија во позитивна зона.
Со овој скок, Биткоинот повторно го зацврсти својот статус како водечко средство во време на економска неизвесност.
