Претседателот на СДСМ, Венко Филипче, на денешната прес-конференција побара граѓаните на референдум да се изјаснат дали ја поддржуваат цената што, според него, државата ја плаќа поради политиките на премиерот Христијан Мицкоски и владејачката структура.
Филипче на прес-конференција изјави дека изјавите на Мицкоски за тоа дека „нема повеќе отстапки за влез во Европската Унија“ отвораат прашања за тоа кои се тие отстапки и кој ќе ја плаќа цената од евентуалната изолација на државата.
Тој оцени дека граѓаните биле манипулирани со тврдења дека се загрозени македонскиот јазик и идентитет, посочувајќи дека, според него, и претставници на власта веќе признавале дека договорите со Грција и членството во НАТО носат придобивки за државата.
Лидерот на СДСМ порача дека цената од застојот на европскиот пат нема да ја плаќаат функционерите на власта, туку граѓаните, младите и идните генерации.
Во обраќањето, Филипче ја обвини власта за економски проблеми, задолжување на државата и, како што рече, создавање вештачки конфликти за да се избегне одговорност за криминал и корупција.
Тој нагласи дека прашањето за европската иднина на Македонија не смее да биде одлука само на власта и побара распишување референдум на кој граѓаните директно би се изјасниле за идниот правец на државата.
