Крушево викендов беше домаќин на првото државно првенство во планински велосипедизам – МТБ Маратон. Организатори на маратронот се велосипедскиот клуб „Energi Cycling“ и Велосипедската федерација на Македонија.
Настанот беше отворен за натпреварувачи и рекреативци од целиот Балкан со цел да ги промовира локалната природа, културата и историјата, да ја подигне еколошката свест и да го поттикне велосипедизмот како спорт и рекреација, соопштуваат од Швајцарската програма „ИМЕ“.
Според организаторите, Крушево станува атрактивна дестинација за планински велосипедизам. Има нови велосипедски патеки и подобрената туристичка инфраструктура. За учесниците патеките се одлично обележани, а природата околу Крушево неверојатна.
МТБ Маратонот е дел од официјалниот календар на Велосипедската федерација на Македонија и е според стандардите на УЦИ (Union Cycliste Internationale).
– Ова е првпат да се одржи државно првенство во дисциплината маратон. Натпреварувачите кои се пласираа во генералниот пласман освоија УЦИ поени и се најдоа на светската ранг-листа на Светската велосипедска федерација, вели Љубиша Кондев од клубот „Energi Cycling“.
Беа доделени признанија и награди во сите возрасни категории. Учесниците можеа да изберат меѓу две рути: мал маратон од 25 километри со искачување од 650 метри и голем маратон од 75 километри со искачување од 2.000 метри.
Крушево е препознатливо по параглајдерство, во јули и август се европсјките и светски првенства, а со добра инфраструктура станува атрактивно и за планинскиот велосипедизам.
Маратонот се одржа со поддршка од швајцарската програма за зголемување на пазарната вработливост „ИМЕ“, на Општина Крушево и на хотелите Панорама и Монтана.
