Спикерот на Собранието, Африм Гаши, денеска на брифинг со новинарите изјави дека ги повикал координаторите на пратеничките групи да постигнат договор за изборот на Народен правобранител, со цел да се избегне дополнително одолговлекување на постапката.
„Ги повикав координаторите на пратеничките групи да се усогласат околу Народниот правобранител и да најдеме решение. Немаше забелешки, никој не беше против, но ќе треба разговори во меѓувреме. Се надевам дека набрзо ќе дојдеме до решение. Никој не го оспорува името на кандидатот“, изјави Гаши.
Тој предупреди дека започнување нова постапка би значело дополнително одолговлекување и неизвесност.
„Ако почнеме нова процедура, уште толку ќе трае, а нема гаранција како ќе заврши, бидејќи не знаеме кој би се пријавил на нов оглас. Влегувањето во таков процес го ризикува целиот избор“, рече спикерот.
Според Гаши, решението мора да произлезе од политички разговори меѓу координаторите на пратеничките групи.
„Од страна на Собранието, постапката е завршена – точката е на дневен ред. Штом има договор, веднаш ќе свикам седница и ќе се гласа. Ги повикувам пратеничките групи да се договорат“, нагласи тој.
Тој додаде дека институцијата веќе е блокирана и дека нова постапка би создала сериозни проблеми.
„Веќе сме во јануари и институцијата е без раководство. Ако одиме со нов оглас и нова постапка, тоа ќе биде голем проблем. Прашањето е дали навистина сакаме да го решиме проблемот – времето нè притиска“, рече Гаши.
Спикерот информираше и дека доколку актуелниот кандидат се повлече, постои можност од веќе пријавените кандидати да се избере нов предлог за Народен правобранител, без распишување нов оглас.
