Големата полициска акција поврзана со заплената на пет тони марихуана во соседна Србија продолжува и денеска во Скопје. Како што пренесува порталот „360 степени“, попладнево десетина комби-возила, пет до шест камиони и повеќе полициски возила влегле во кругот на поранешната фабрика ОХИС, каде што од вчеравечер се спроведуваат оперативни активности.
Локацијата е под силно полициско обезбедување, а пристапот за јавноста е ограничен.
Според информациите, акцијата е насочена кон мрежа на т.н. легални производители на канабис, при што се вршат претреси на повеќе локации во Скопје и Струмица. Активностите се реализираат во координација помеѓу Министерството за внатрешни работи и Основното јавно обвинителство за гонење организиран криминал и корупција.
Акцијата следува откако српските медиуми минатата недела објавија дека дрогата запленета во близина на Крушевац била набавена од македонска територија. Повеќе детали се очекуваат по завршувањето на истрагата.
