Жарко Грозданоски, лекар анестезиолог вработен во Клиничка болница Тетово, се терети дека го убил Климе Митревски поради имот вреден над еден милион евра во старото охридско јадро , по претходно склучен договор за доживотна издршка, објави Охридскај.
Криминалистичката полиција при СВР Охрид го расчисти убиството на Климе Митревски, сопственик на угостителскиот објект „Климентов Конак” во старото охридско јадро, во рок од помалку од 12 часа. Сторителот е идентификуван и приведен набрзо по извршување на злосторството.
За убиството е осомничен Жарко Грозданоски од Брвеница кај Тетово, специјалист-анестезиолог и вработен во Клиничка болница Тетово. Според истрагата, Грозданоски и Митревски претходно склучиле договор за доживотна издршка, со кој Грозданоски се обврзал да го чува и негува Митревски во замена за наследство.
Наследството кое Грозданоски сакал да го присвои претставува недвижен имот во старото охридско јадро со проценета вредност од над 1.000.000 евра. Се смета дека обвинетиот свесно го забрзал умирањето на жртвата со цел побрзо да го стекне владеењето врз имотот.
Жарко Грозданоски е официјално обвинет за убиство сторено од користољубие , кривично дело кое во македонскиот Кривичен законик носи една од највисоките казни затвор.
Случајот предизвика бројни прашања во јавноста, особено поради двојниот статус на осомниченото лице , лекар кој денес стои под обвинение за намерно одземање на живот. Медицинскиот персонал во клинички установи ужива висок степен на доверба, а нивниот пристап до пациенти и медикаменти ги прави евентуалните злоупотреби особено тешко докажливи.
СВР Охрид потврди дека истрагата продолжува, а во тек е и соработка со правосудните органи. Случајот е проследен и до Јавното обвинителство, кое треба да одлучи за притвор и понатамошна постапка.
