Во својот есенски извештај, Европската банка за обнова и развој (ЕБОР) ја ревидираше нагоре проекцијата за македонската економија. Банката предвидува пораст од три проценти за 2025 и 2026 година, што претставува зголемување од 0,4, односно 0,3 отсто во однос на прогнозата од мај.
Во економскиот извештај на ЕБОР, објавен вчера, се истакнува дека Македонија постигнала подобри резултати од очекуваните во првото тромесечје од 2025 година, со солидни резултати во градежништвото и зголемени вложувања. „Растот на реалниот БДП достигна 3 проценти на годишно ниво во првиот квартал од 2025 година и дополнително на 3,4 проценти во вториот квартал, првенствено поттикнат од градежништвото, производството и трговијата.“
Во овој период, трошењето на домаќинствата било поддржано од зголемувањето на приходите и намалувањето на инфлацијата, додека изградбата на патишта ги зајакнала инвестициите. Извозот се ревитализирал во првата половина од 2025 година по послабите извозни резултати во претходната година. Сепак, дефицитот на тековната сметка се зголемил за 66 проценти во истиот период, што е одраз на помалите суфицити и во трговијата со услуги и во секундарниот доход.
По укинувањето на ограничувањата на маржата на профит за одредени основни производи, инфлацијата се зголемила на 4,8 проценти до јули 2025 година пред да се намали на 4,4 проценти во август. Фискалната политика останува експанзивна, со ревидирана цел за дефицит за 2025 година поставена на 4 проценти од БДП, со цел да се балансира фискалната консолидација со тековните вложувања во инфраструктурата. Дефицитот за периодот јануари-јули 2025 година достигна 2,5 проценти од проектираниот БДП, бидејќи расходите го надминаа растот на приходите.
Реалниот раст на БДП е проектиран на 3 проценти во 2025 и 2026 година, поткрепен со силна домашна побарувачка и забрзано извршување на јавни инвестициски проекти, посебно изградбата на автопатски делници долж паневропските коридори 8 и 10. Зголемените вложувања во општините пред локалните избори кон крајот на 2025 година може да дадат дополнителен стимул на краток рок. Се очекува трошењето на домаќинствата да остане стабилно, поддржано од зголемувањето на реалните плати и повисоките владини трансфери.
Ризиците за економските перспективи произлегуваат од ограничениот фискален капацитет и надворешната нестабилност, посебно поради структурните прилагодувања во европската автомобилска индустрија и зголемената глобална неизвесност, се наведува во извештајот на ЕБОР во делот за Македонија.
Во однос на економските изгледи на регионот на Западен Балкан, се посочува дека растот забавил, од 3,6 проценти во 2024 година на 2,4 проценти во првата половина од 2025 година. Се очекува годинава да достигне 2,7 проценти, а наредната да биде 3,2 отсто. Надолните ревизии на прогнозите за 2025 година се последица од побавниот раст во развиените земји во Европа, послабите од очекуваните резултати во градежништвото и инвестициите во Србија и бавниот напредок на реформите, заедно со слабото индустриско производство и извоз во Босна и Херцеговина.
Највисок раст годинава во регионот, според ЕБОР, годинава ќе има Косово 3,9 проценти, Албанија, 3,5, Црна Гора 2,6, Србија 2,5, а најнизок Босна и Херцеговина 2,2 отсто. Во регионите што ги покрива ЕБОР, пак, годинава се очекува раст од 3,1 процент. Најголеми ризици за економијата се геополитички тензии, американски царини, конкуренција од Кина и ограничениот фискален простор.
