Повеќе од 1 000 пациенти во изминативе 3-4 дена побарале медицинска помош во болницата во Гостивар. Оттаму велат дека поголемиот број од пациентите се со исти симптоми како повраќање, дијареја, болки во желудникот, температура, омалаксаност итн. Најголем дел од нив се на Инфектологија, на Детското одделение и во Ургентната единица.
„За овие денови во ЈЗУ Општа болница ‘Д-р Ферид Мурат’ со овие симптоми се пријавени околу 1 000-1 200 пациенти. На сите пациенти им е дадена медицинска помош, односно соодветна терапија. Овој број на пациенти е надвор од редовните бројки на пациенти во нашата установа“,велат оттаму.
Од болницата преку соопштение уверуваат дека го зајакнале медицинскиот персонал во одделенијата каде што има голем број пациенти.
Истовремено, Агенцијата за храна и ветеринарство (АХВ) издаде забрана за употреба на водата за пиење од гостиварскиот водоводен систем поради основано сомнение дека е сериозно загадена и небезбедна за здравјето на граѓаните.
Од Секторот за внатрешни Тетово денеска соопштија дека постојат основи на сомневање дека активности на Јавното претпријатие „Водовод“ и на Општина Гостивар довеле до загрозување на здравјето на граѓаните на градот. За да го зајакнат притисокот во градската водоводна мрежа, незаконски поставиле пумпи во корито на истечни отпадни води кои потоа навлегле во системот кој напојува градот.
Државниот јавен обвинител Ненад Савески денеска кажа дека Обвинителството постапува, но дека е рано за правна квалификација на случајот.
