Бенјамин Нетанјаху ќе предложи повторна целосна окупација на Појасот Газа кога ќе го свика својот безбедносен кабинет оваа недела, објавија израелските медиуми.
„Одиме во целосно освојување на Појасот Газа и да го поразиме Хамас“, изјави еден израелски функционер.
Одговарајќи на извештаите дека началникот на армијата и други воени лидери се спротивставуваат на планот, неименуваниот функционер рече:
„Ако тоа не функционира за началникот на генералштабот, треба да поднесе оставка“.
Семејствата на заложниците стравуваат дека ваквите планови би можеле да ги загрозат нивните најблиски. Се верува дека 20 од 50 заложници во Газа се живи, додека анкетите покажуваат дека три четвртини Израелци сакаат договор за прекин на огнот како начин за нивно враќање дома.
Стотина поранешни израелски функционери вчера објавија заедничко писмо до Доналд Трамп, барајќи од него да го притисне Нетанјаху да ја заврши војната.
„Од воена гледна точка, Хамас е целосно уништен. Од друга страна, идеологијата станува помоќна и помоќна кај Палестинците и во исламскиот свет. Така што, единствениот начин да се порази идеологијата на Хамас е да се понуди подобра иднина“, кажа бившиот шеф на израелската разузнавачка агенција Ами Ајалон, еден од потписниците на писмото.
Израел ги разгледува следните чекори откако пропаднаа индиректните претовори со Хамас за прекин на огнот и враќање на заложниците.
Израелската војска вели дека веќе има оперативна контрола врз 75% од Газа. Но, според предложениот план, таа би ја окупирала целата територија, преместувајќи се во областите каде што сега се концентрирани повеќе од два милиона Палестинци. Не е јасно што би значело тоа за цивилите и за операциите на ОН и другите хуманитарни групи. Околу 90% од 2,1 милион луѓе во Газа се раселени и живеат во пренаселени и ужасни услови, а многумина и гладуваат.
Израел ги повлече своите сили од Газа во 2005 и ги растури доселеничките населби.
