Националната вселенска агенција на САД (НАСА) ќе изгуби околу 3.900 вработени како резултат на политиката за намалување на бројот на федерални вработени што ја спроведе Доналд Трамп. НАСА соопшти дека приближно 3.000 луѓе биле дел од вториот бран отпуштања што заврши синоќа.
Додавајќи ги 870-те луѓе кои учествуваа во првата рунда од таа програма и редовните пензионирања, работната сила на американската вселенска агенција ќе се намали од 18.000 пред Доналд Трамп да ја преземе функцијата кон крајот на јануари на 14.000, што е намалување од 20 проценти.
Оние кои ќе одлучат да ја напуштат НАСА како дел од програмата ќе бидат ставени на отсуство до датумот на нивното заминување.
Неименуван портпарол на агенцијата истакна дека бројките би можеле значително да се променат во наредните недели.
НАСА нагласува дека „безбедноста останува врвен приоритет“ бидејќи се стреми да „балансира помеѓу потребата да стане поефикасна со потребата да остане целосно способна за продолжување на златното доба на истражувањето и иновациите, вклучително и истражувањето на Месечината и Марс“.
Порано оваа година, администрацијата на Трамп предложи буџет на НАСА фокусиран на враќање на луѓе на Месечината и мисија на Марс, на сметка на науката и климатските програми. Белата куќа објави дека сака да „ја победи Кина во трката до Месечината и да го испрати првиот човек на Марс“.
Кина го планира своето прво слетување со екипаж на Месечината до 2030 година, додека американската програма „Артемис“ беше одложувана неколкупати.
На почетокот на јули, Доналд Трамп го назначи Шон Дафи, неговиот министер за транспорт и поранешен ТВ водител, за шеф на федералната агенција НАСА, а првично го предложи бизнисменот Џаред Исакман, близок соработник на милијардерот Илон Маск, за таа позиција, кој на крајот беше одбиен.
