Кинеските власти приведоа маж кој предизвика јавен бес откако мачел кучиња и го снимал злоставувањето за да го продаде преку интернет. Човекот се претставил како страствен хранител на животни, но на крајот злоставувал неколку мачки и кучиња што ги примил.
Неговите постапки биле откриени откако пријателка на жената која му дала кученца на посвојување го споделила своето искуство на интернет, што довело до протест на повеќе од 100 луѓе пред неговата куќа во градот Чонгкинг во југозападна Кина, пишува Би-Би-Си, а на социјалните мрежи се прошириле извештаи дека полицијата ги тепала и бркала демонстрантите.
Човекот објавил оглас на кинеската социјална мрежа Доуин претходно овој месец, велејќи дека сака да посвои кучиња бесплатно. Тој тврдел дека неговите две деца „сакаат кученца“. Пред четири дена, волонтери од здружението за права на животните пронајдоа едно од посвоените кученца напуштено на скалите од зградата на Ли. Според извештаите, кученцето имало скршена нога, отсечена опашка и отечена глава.
По веста за апсењето на човекот, луѓето побараа строга казна. „Ова е ужасно. Апсолутно сум за строга казна!“, гласеше еден коментар на кинеската социјална мрежа Веибо.
