Бизнисменот Трифун Костовски, кој е меѓу обвинетите во предметот за стечајот на „Еуростандард банка“, преку објава на социјалните мрежи ги отфрли наводите во обвинението, оценувајќи дека не постои логика да биде обвинет за несовесно работење во институција во која, како што вели, вложил сопствен капитал и личен углед.
Костовски е обвинет во својство на поранешен претседател и член на Надзорниот одбор на банката. Во реакцијата наведува дека како еден од акционерите имал директен интерес „Еуростандард банка“ да продолжи со работа, а не да заврши во стечај.
„Бев акционер, човек кој имаше личен, деловен и животен интерес банката да опстои, а не да пропадне. Која логика би ме навела несовесно да управувам со институција во која сум вложил сопствен капитал, труд и години од својот живот“, наведува Костовски.
Тој посочува дека Надзорниот одбор броел пет члена и дека сите одлуки биле носени колективно, со мнозинство гласови. Според него, останува нејасно зошто обвинението ја индивидуализира неговата одговорност ако одлуките биле донесувани како колективен орган.
Во објавата Костовски упатува критики и до обвинителката која го води предметот, тврдејќи дека истрагата трае повеќе од пет години без, како што наведува, да бидат утврдени елементи на организиран криминал или перење пари. Тој оценува дека на крајот бил обвинет за несовесно работење, а не за делата што првично биле предмет на истрагата.
Основното јавно обвинителство за гонење организиран криминал и корупција претходно поднесе обвинение против четири лица во врска со стечајот на „Еуростандард банка“. Тројца се товарат за кривичното дело „предизвикување стечај на банка“, додека за Костовски е поднесен обвинителен предлог за „несовесно работење во службата“. Според обвинителството, со одобрување ризични кредити и непочитување на законските процедури била предизвикана штета поголема од 1,6 милијарди денари.
