Веста за смртта на Владо Јаневски ја потресе македонската јавност. Еден од најголемите музички автори и пејачи во земјава зад себе остави безвременски песни, а неговото заминување предизвика бран од емотивни пораки од колеги, пријатели и јавни личности кои преку социјалните мрежи му оддадоа последна почит.
Меѓу првите се огласи Дарио Панковски, кој се потсети на долгогодишното пријателство и заедничките настапи.
„Толку многу години заедно на сцена и толку многу работи сме поминале заедно, што би можел книга да напишам… Ова беше пребрзо, шокантно, трагично и некако… нестварно. Нека ти е вечна слава, мој Јаневски, многу ми е жал, многу…“, напиша Панковски.
Со емотивна порака се прости и актерката Весна Петрушевска, која сподели извадок од роман на Фјодор Достоевски, додавајќи:
„Знам дека го сакаше… не знам што да кажам… ќе фалиш…“
Бобан Милошески и продукцијата „Авалон“ се простија со стихови што многумина ги поврзаа со една од најпознатите песни на Јаневски.
„Владо, ако нема некогаш и негде, ништо не си изгубил. Остануваме овде, ние, секој ден да глумиме лудило, дека е сѐ како што треба, а ништо не е и нема да биде без сите вас, кои вака тивко, а пребрзо си одите! Значи, Владо, некогаш и негде! Биди раат.“
Раперот Слаткаристика напиша дека Македонија изгубила еден од своите најголеми автори.
„Замина Владо Јаневски, еден од најголемите македонски поети на 21 век. Неговите стихови и песни ќе живеат засекогаш. Вечна му слава.“
Со неколку зборови полни со емоции се прости и Тијана Дапчевиќ.
„Другарче мое… мирно патувај кон вечноста… многу ќе ѝ недостасуваш на твојата ‘Тијанисимо’… ме искрши.“
Игор Џамбазов порача дека во вакви моменти зборовите не се доволни.
„Збогум Владо… Понекогаш зборовите не се доволни. А понекогаш се излишни. Слава ти! И ти благодарам за сѐ што направи…“
Каролина Гочева се прости со една од своите омилени песни од Владо Јаневски.
„Владе мој… Збогум со мојата најомилена песна од тебе… и никогаш нема да заборавам…“
Пејачката Калиопи се потсети на нивното долгогодишно пријателство.
„Си замина тивко, без поздрав… Ми беше другар, а јас твојата Каља, како што милуваше да ме викаш… Многу нешта споделивме во овој живот и во следниот повторно ќе се најдеме… Некогаш и негде…“
Емотивна беше и Ана Костадиновска, која напиша:
„Делевме проба повеќе од 20 години. Фраериште! Светол пат, Владе мој.“
Во текот на денот со пораки на сочувство се огласија и бројни други музичари, актери, водители и јавни личности, кои се потсетија на неговото огромно музичко наследство и на трагата што ја остави во македонската музика.
Владо Јаневски зад себе остави десетици песни што со години живеат меѓу публиката, а судејќи по реакциите, неговото творештво ќе продолжи да живее и во генерациите што доаѓаат.
