СДСМ утрово испрати две соопштенија до медиумите во кои користи најдолни навреди кон уредникот на Плусинфо Бранко Героски.
Во продолжение соопштението во целост
Кога ботовите ќе „зарибаат“, затоа што се програмирани само за една функција, тогаш во помош стапува најискусниот припадник на специјалната единица на кујната на ВМРО. Познат уште од времето на Груевски, член на елитната „панцир“ единица – Фрљо.
Во македонската јавност познат како џубокс-новинар. Уште одамна овој прочуен ПР-експерт си даде препознатлив слоган: „Кој ќе плати – тој ќе клати“.
Фрљо, како и секогаш, темелно пристапува кон анализата на секое соопштение на СДСМ, па дури користи и вештачка интелигенција. Па како да не, кога лично го вметна инвестирањето во вештачката интелигенција како еден од најважните столбови на новата програма на ВМРО?!
Фрљо знае дека времето малку го прегазило и затоа му е потребна помош од технологијата.
Единствено што нè загрижува е неговата, очигледно застарена, меморија. Нè чуди што Фрљо се расфрла со податоци за „српскиот свет“, а не се сеќава на сопствениот удел во него.
На пример, Фрљо не се сеќава на периодот кога работеше во еден реномиран дневен весник, а неговиот газда беше од Србија. Меморијата му „зарибала“ и кога станува збор за избришаните податоци од времето кога работеше за белградскиот „Курир“ (денес веќе јавно познато во сопственост на истиот тој Вучиќ, на кого, изгледа, единствено се сеќава). Очигледно, меморијата целосно откажала.
Иако Фрљо не е обичен бот, тој сепак е една напредна (да не кажеме – српска напредна) машина на која очигледно ѝ недостига замена на работната меморија. Можеби во тоа може да му помогне неговиот стар воен другар, ветеран Латас.
Очигледно е дека треба малку да се направи дефрагментација на старите податоци. Се насобрала прашина.
До тогаш, додека не ја замени меморијата, да го потсетиме дека некогаш одамна напиша книга со наслов „Биди новинар“. Му предлагаме да ја прочита и можеби да се потсети на некои основи на слободното новинарство. А докторите велат дека кога ќе се појави амнезија, дури и ситници од младоста можат да бидат тригер за меморијата целосно да се врати.
СДСМ Центар за комуникации со јавноста
