Александар Николоски, потпретседателот на ВМРО-ДПМНЕ, имаше свое обраќање на денешниот народен митинг во општина Прилеп, одржан во рамки на изборната кампања под слоган „Вистинскиот избор! Твојот човек! Твоето место! За твојата иднина!“, за претстојните локални избори закажани на 19 октомври. Николоски зборуваше за опозициските СДСМ, ДУИ, Левица, кои според него се коалиција која води само црна кампања. Николоски порача дека оние кои национално ја обезличија држава се веќе минато, а и ја нагласи важноста на денешниот празник 11 октомври. Тој повика на масовна излезност на локалните избори на 19 октомври.
„Ние зборувавме и минатата година, дека ни треба вашата поддршка за да ставиме крај на владеењето на СДСМ и ДУИ, да ставиме крај на владеењето на Али Ахмети, на Зоран Заев и на Венко Филипче, а сега од скоро, рамо до рамо со нив и Димитар Апасиев. Таа тројна црна коалиција на ДУИ и СДСМ и Левица, којашто освен со црна кампања со ништо друго не се занимава“, рече Николоски.
Николоски истакна дека политичките опоненти се очајни и ја покажуваат сопствената паника, затоа што се свесни што ќе се случи на претстојните локални избори.
„Очајни, панични, гледам дека се свесни што ќе се случи, па се обидуваат во последните денови да внесат и по малце во целата работа и хумор и сатира, но пред сè ја покажуваат сопствената паника“, кажа Николоски и додаде:
„Па еве го вчера не издржа и Стево Пендаровски, којшто вие народот, на минатогодишните избори го поразивте како никој друг претходно. Ни срам, ни перде, излезе, зборува, раскажува бајки, раскажува приказни. Вели 90% од политичарите биле опседнати со тајните служби, демек тој не бил, а пола интервју му беше за тајните служби и само потврди дека ги злоупотребувал затоа што информациите коишто ги сподели, јасно покажуваат дека ја користеше Агенцијата за разузнавање, не за да ја штити Македонија надвор, како и што и е работата, туку за него да му помага политички, колку му помогна политички, виде минатата година со најголемиот пораз, којшто било кој, било кога го видел“.
Николоски додаде дека оние кои национално ја обезличија Македонија, веќе се минато, а и потсети дека 11 октомври беше национално востание предводено од македонскиот народ, а претходната влада која правеше ревизија на историјата од минатата година се минато.
„На овој ден е чесно да се каже, дека националните предавници се позади нас, дека оние коишто национално ја обезличија Македонија, се позади нас. Затоа што на 11 октомври не почна востание коешто беше идеолошко, на комунисти против ројалисти, туку почна востание коешто беше национално и коешто го водеше македонскиот народ против окупаторите, а не против администраторите. И тоа треба да го кажеме затоа што ревизија на историја правеа оние коишто од минатата година се минато“, нагласи Николоски.
Николоски повика на масовна излезност на локалните избори: „Затоа ни е потребна голема масовна референдумска излезност за да можеме да продолжиме да ја штитиме да ја браниме и да ја градиме Македонија на чело со премиерот Мицкоски“.
