Баритонот и првенец на Националната опера и балет (НОБ) Ристе Велков е еден од четирите лица кои синоќа загинаа во сообраќајка на обиколницата во Скопје, потврдија од институцијата за САКАМДАКАЖАМ.МК.
Министерството за внатрешни работи (МВР) соопшти дека синоќа во 23 часот во СВР Скопје е пријавено оти на обиколница на Град Скопје, помеѓу надвозник Визбегово и клучка Мирковци, Б. Б. (76) од Косово, управувајќи товарно возило – влекач „ман“ со полуприколка со косовски национални ознаки, изгубил контрола над возилото и со него преминал преку металната ограда во спротивната насока на автопатот при што се судрил со патничко возило „бмв“ со скопски регистарски ознаки, управувано од Р. В. (51) од Скопје.
Од сударот настанал пожар во двете возила од кој патничкото возило и кабината на влекачот целосно изгореле. Пожарот бил изгаснат од екипа на Бригадата за противпожарна заштита Скопје.
Од добиените повреди на местото на несреќата починал возачот Р. В. и сопатниците од неговото возило, А. В. (20) и П. М. (20) од Скопје и уште едно лице чиј идентитет засега е непознат. Лекар од Итна медицинска помош констатирал смрт, а по наредба на јавен обвинител телата на починатите се дадени на обдукција.
Исто така, по наредба на јавен обвинител возачот Б. Б. е лишен од слобода и задржан во полициска станица.
По целосно расчистување и документирање на случајот ќе биде поднесена соодветна пријава.
За време на вршење на увидот, односно во периодот од 23:10 до 05:00 часот сообраќајот е пренасочуван на патниот правец Тетово-Велес, кај клучка Приштина кон село Визбегово и Велес-Тетово кај клучка Мирковци. Во 05:00 часот сообраќајот е нормализиран.
Велков е роден е во 1975 во Скопје. Како реномиран солист–првенец на Националната опера и балет, тој претежно настапувал во белканто продукции, со што го заслужува и оправдува епитетот- италијански баритон со кадифена боја. Во текот на неговата кариера, Велков има реализирано 26 улоги. Во неговиот репертоар има остварено повеќе од 15 водечки улоги во опери како „Набуко“, „Риголето“, „Магбет“, „Травијата“.
