Истражувачите од Технолошкиот институт во Масачусетс (МИТ) развија два нови потенцијални антибиотици користејќи вештачка интелигенција (ВИ).
Лековите се насочени кон гонореја и метицилин-резистентен Staphylococcus aureus (MRSA), таканаречен супербактерија, објавува Би-Би-Си.
За разлика од претходните обиди кои се потпираа на пребарување на познати хемикалии, овој пат вештачката интелигенција ги дизајнираше молекулите атом по атом. Тестовите во лабораторија и на животни покажаа дека антибиотиците се ефикасни во борбата против овие инфекции.
Сепак, потребни се уште неколку години клинички испитувања и усовршување пред лековите да им станат достапни на пациентите.
Професорот Џејмс Колинс од МИТ вели дека пристапот би можел да означи „второ златно доба“ во откривањето на нови антибиотици, што е клучно бидејќи прекумерната употреба на постојните лекови води до појава на сè поотпорни бактерии.
Оваа студија, објавена во списанието Cell, тестираше 36 милиони хемиски соединенија, вклучувајќи ги и претходно непознатите, а ВИ беше обучена да разбере како различните молекуларни структури влијаат врз бактериите.
