Министерот за локална самоуправа Златко Перински се надева дека до 12 септември, за кога е закажана последната седница во Собранието пред локалните избори, ќе бидат изгласани предлог-измените на Законот за локална самоуправа. Перински смета дека измените на Законот за локална самоуправа се неопходни за зголемување на демократијата на локално ниво. Тој ги обвини СДСМ и ДУИ дека со нивното однесување го спречуваат носењето на законот, и покрај месеците консултации со сите засегнати страни.
Перински истакна дека измените се од суштинско значење бидејќи воведуваат неколку клучни реформи како референдумско отповикување градоначалник, воведување комунален редар и поголема транспарентност.
Министерот посочи дека измените не содржат ништо спорно што би ги обременило другите процеси, туку, напротив, ќе го подигнат квалитетот на локалните услуги и ќе ја зголемат демократијата.
„Се надевам дека ќе бидат донесени бидејќи тоа ќе биде и последна можност да се изгласа законот. Во предлог-измените во преодните и завршни одредби стои дека законот откако ќе се изгласа ќе почне со негова примена практично на следните редовни локални избори. Така што ако не го фатиме овој турнус тоа значи дека градоначалниците, согласно новите мандати, не ќе може да се применува“,рече Перински.
Прашан како недонесувањето на овие предлог-измени ќе се одрази врз работата на идните градоначалници што во тој случај нема да мора да стравуваат од тоа дека ќе бидат разрешени, Перински вели дека со тоа ќе се потврди дека СДСМ и ДУИ се виновни што градоначалниците ќе останат единствените јавни функционери што нема да имаат можност за отповикување.
Прашан кои се конкретните барања и забелешки на ДУИ и СДСМ, Перински рече дека немаат добиено ништо конкретно од нивна страна.
„Дури и кога беше законот на собраниска комисија на прво и второ читање она што беше применливо во рамки на системскиот закон за локална самоуправа предложено од ДУИ, од СДСМ беше прифатено и интегрирано преку нивните амандмани“,рече тој.
Во предлог-законот за изменување и дополнување на Законот за локална самоуправа, меѓу другото, се предвидува референдумско отповикување градоначалници, воведување комунална полиција и поголемо учество на граѓанскиот сектор во носењето одлуки на локално ниво.
