Да има црква во Грција во која богослужбите ќе се изведуваат на македонски јазик, барање е кое Македонците од Грција му го испратиле на Вселенскиот патријарх Вартоломеј.
Во писмото кое на својот Фејсбук профил го објави Павлос Воскопулос – Филипов, еден од лидерите на Македонците во оваа соседна земја наведува дека се бара литургиите да се изведуваат на нивниот мајчин современ македонски јазик, кој припаѓа на поширокото семејство на јужнословенски јазици, и со азбуката измислена од Свети Кирил и Методиј. Воскопулос во изјавата за весникот ВЕЧЕР потврди дека е испратено ова писмо со надеж дека ќе биде прифатено.
-Со ова писмо сакаме да ги земеме предвид важните прашања и, истовремено, барањата кои се однесуваат на нас православните христијани од малцинството етнички Македонци во Грција. Бараме да има црква на нашиот мајчин современ македонски јазик, која припаѓа на поширокото семејство на јужнословенски јазици, азбуката измислена од Свети Кирил и Методиј. Конкретно, посакуваме Божествената Литургија да се одржи на современ македонски јазик барем во некои недела во областите на Грција каде живееме православни христијани, етнички македонски грчки граѓани- наведува Воскопулос, кој е едне од лидерите на организацијата на Македонците во Грција во својот допис.
Вселенскиот патријарх Вартоломеј е надлежен за дел од епархиите во северниот дел на Грција и кое подрачје таму се нарекува Новите земји. Тоа е подрачје на кое во голем дел живеаат припадниците на македонската етничка заедница.
Во своето обраќање Воскопулос објаснува дека за жал, на локалните домашни македонски православни христијани од Новите земји по 1913 година поради прогони и забрани им се ограничени многу човекови права од јавниот живот.
-Од почетокот на минатиот век Црквата, Државата и парадржавата во Грција понекогаш молчи а понекогаш со отворено насилство, закани и заплашување ни го сменија јазикот, нашите имиња и националниот идентитет. И денес сме жртви на тивко непријателство и нетолеранција на значителен дел од свештенството на Метрополисите на новите земји и токму затоа ви се обраќаме директно преку нашиот политички носител Виножито. Знаејќи дека Метрополисите на новите земји на Северна Грција се подложени на ваша надлежност, ве молиме да интервенирате и да ги прифатите нашите барања – се потенцира во обраќањето.
Воскопулос додава дека по ратификацијата на Преспанскиот договор меѓу Грција и Република Северна Македонија веруваат дека е време да ставиме крај на неправдата кон локалното малцинство на Македонци.
-Тие православни христијани, Македонци по националност, ги почитуваат Метрополисите на Новите Земји. Да најдеме решение за нашите верски обврски што се однесува до нашиот јазик преку искрен дијалог од сите страни. Ви посакуваме да не прегрнете со топлината – се наведува во писмото.
Молбата е и Вселенскиот патријарх да ги извести свештениците на Метрополиите на Новите земји – и за Крштевањето и постхумното спомнување на православните христијани – етнички Македонци со нивни традиционални македонски имиња: Зора, Софка, Стојанка, Борис, Злата, Доре, Стоико, Томе, Дорча, Гоце Велика, Кирил, Слава, Траико, Спасе, Колиос, Китка, Стогијан, Петко, Митре, Сфета, Трице, Трајанка, Сфетко, Ристо, Петка, Васка…
