Известувачот на Европскиот парламент за Србија, Тонино Пицула, изјави дека ниту еден од клучните политички фактори во ЕУ повеќе нема илузии за тоа кој е српскиот претседател Александар Вучиќ и каков тип влада предводи, пренесуваат денеска регионалните медиуми. Според него, Србија во сегашната состојба не може да стане членка на Европската Унија.
„Прашањето е како да се дефинира ставот кон алтернативата – кон оние кои потенцијално би можеле да дојдат на власт утре, но во моментов ова е неизвесна политичка драма. Според мене, владата на Вучиќ има легалитет, но демонстрантите добиваат легитимитет“, рече Пицула, цитиран од хрватски „Индекс“.
Тој, исто така, коментираше за трагедијата со уривањето на настрешницата на железничката станица во Нови Сад, во која загинаа 16 лица, изразувајќи загриженост дека „17-тата жртва може да падне во ескалацијата на судирите на улиците на српските градови“.
„Ова е исклучително сериозно предупредување до оние кои мора да одлучат дали да бараат каков било компромис за иднината на Србија. Излезот мора да се најде преку избори“, нагласи Пицула.
Тој нагласи дека Хрватска мора да заземе поцврст политички став против „сите манипулации на владата на Вучиќ“, која, како што рече, „периодично ги притвора хрватските граѓани и ги протерува од земјата“.
Во врска со неговата фотографија од воените години, објавена околу годишнината од операцијата „Бура“, Пицула рече дека е изненаден од негативната реакција, но нагласи дека „немал намера да провоцира“.
„30-годишнината од меѓународно признатата операција со која Хрватска го започна своето патување беше едноставно добра прилика да им се обратам на луѓето со кои ги споделив тие времиња, како и на граѓаните“, објасни тој.
Според него, ставот кон минатото е клучот за она што се случува во Србија денес:
„Очигледно е дека Србија во моментов е земја која во многу аспекти не може да се согласи за својата иднина, но постои консензус кога станува збор за толкување на минатото – и токму тоа го видовме по моето објавување“.
