Неврохирургот проф. Маурицио Јаконаџели, од болницата „Торете“ во италијанскиот град Анкона, откри неверојатна приказна за 64-годишен пациент кој преживеал два дена со стрела во главата.
Беше испукана од неговиот самострел и му го прободе черепот – од челото до задниот дел од главата. И покрај ова, тој не ја изгубил свеста и поминал два дена дома пред да биде донесен во болница.
Ризик од тешко крварење
„Стрелата не ги оштетила клучните делови од мозокот, главните крвни садови, вените и артеријата. Само еден милиметар подалеку и пациентот веднаш ќе умрел. Имал неверојатна среќа“, објаснил професорот.
Додека не стигнал во болница, не јадел ниту пиел, а не можел да ја движи главата поради положбата на стрелата. Лекарите внимателно ги проучувале компјутерските томографски снимки за да се подготват за операцијата, а полицијата започнала истрага за бизарниот инцидент.
„Не е важна само процедурата, туку и начинот на кој се подготвува, вклучително и анестезијата. Вадењето на стрелата носело ризик од обилно крварење, бидејќи ја држела раната затворена, како чеп“, рекол медицинскиот експерт.
Повредите од ваков вид се многу ретки во Италија, објавува „Кориере дела Сера“.
„Мозокот е неверојатен“
„Се сеќавам на пациенти со истрели од огнено оружје и убодни рани во главата, што сум ги видел во Америка, но овде е невообичаено“, додаде тој.
Потсетувајќи се на случајот со Финеас Гејџ, кој во 19 век преживеал прободување на черепот со железна шипка, професорот истакнува дека е можно да се случи промена во личноста или когнитивните функции, но се надева на целосно закрепнување на пациентот.
„Мозокот е чудотворен, има способност да ги преземе функциите на оштетените делови. Имаме примери на пациенти по операција на тумор кои почнуваат да зборуваат на друг јазик, како мозокот да притиснал копче“, рече тој.
Засега, состојбата на пациентот е критична, но лекарите веруваат во неговата сила и наука, која ги поместува границите на она што е можно секој ден.
