Претседателката Гордана Сиљановска-Давкова, официјално го прогласи за отворен Младинскиот олимписки фестивал (ЕМОФ) 2025, истакнувајќи го значењето на спортот како симбол на единство, култура и надеж.
-Спортот ја манифестира убавата страна на сегашноста и ја гарантира светлата иднина на европскиот спорт, порача претседателката Сиљановска, нагласувајќи дека фестивалот е ретка можност за младите спортисти и гостите да се запознаат со македонската култура.
Според неа, игрите се „симбол на младост и витештво, генератор на заедништво и солидарност, креатор на европски културен и спортски дијалог“.
Таа изрази уверување дека нашата држава ќе се покаже како хуман и достоен домаќин, со страсна спортска публика и им посака успех на сите учесници.
-Продолжете да го развивате олимпискиот дух, да ширите добра волја и пријателство, да праќате пораки за мир, порача претседателката.
Дополнителен акцент на церемонијата даде и Спирос Капралос, претседател на Европските олимписки комитети, кој истакна дека оваа едиција ќе биде запомнета по својата топлина, енергија и дух.
-Следните седум дена, Скопје е вашата сцена каде што можете да стекнете пријателства – вие ја носите енергијата, страста и надежта за она што доаѓа, нагласи тој.
Со дефиле на 50 делегации, во Спортскиот центар „Јане Сандански“ вечерва започна Европскиот младински олимписки фестивал (ЕМОФ) Скопје 2025.
Свечената церемонија го означи почетокот на седумдневен спортски и културен спектакл кој ќе ги обедини младите спортисти од цела Европа во духот на фер-плеј, солидарност и пријателство.
ЕМОФ Скопје 2025 ќе вклучува натпревари во 15 спортски дисциплини: атлетика, пливање, кошарка, баскет 3×3, ракомет, одбојка, џудо, спортска гимнастика, друмски велосипедизам, маунтајн бајк, кајак слалом, бадминтон, стрелаштво, пинг-понг и таеквондо.
Натпреварите ќе се одржуваат на спортски објекти со меѓународен стандард во Скопје и Куманово, додека натпреварите во спортска гимнастика ќе се одржат во Осиек, Хрватска, во соработка со Европскиот и Хрватскиот олимписки комитет. Се очекува учество на повеќе од 4.000 млади спортисти, тренери, спортски официјални лица и тимски претставници, како и стотици новинари, волонтери и гости. Македонија годинава ќе биде претставена со рекорден број на спортисти кои ќе учествуваат во сите спортови.
