Од 1 јануари Владата ќе воведе пресметка на просечна потрошувачка кошничка за најмалку четиричлено семејство, најави заменик-министерот за економија и труд Марјан Ристески. Покрај синдикалната минимална кошничка, новата пресметка ќе служи како основа за креирање економски политики и зачувување на животниот стандард.
Како што посочи Ристески, темата ќе биде разгледана на седница на Економско-социјалниот совет закажана за 22 декември, каде синдикатите и работодавачите ќе имаат можност да дадат мислење за предложениот модел.
Просечната потрошувачка кошничка ќе се пресметува врз основа на цените во најголемите супермаркети, основните прехранбени производи и регионалните разлики, при што ќе се земаат предвид и сезонските карактеристики на овошјето и зеленчукот.
Ристески најави дека во иднина ќе се изработуваат и други кошнички – за двочлено и трочлено семејство, како и за пензионери.
Во однос на минималната плата, тој истакна дека зголемувањето согласно Законот треба да се случи до крајот на март 2026 година и да изнесува од 1.700 до 2.000 денари, но Владата е отворена за евентуални измени доколку синдикатите и работодавачите постигнат договор за нова формула.
