Според соопштението на Централната команда на САД (CENTCOM), повеќе од 10.000 американски морнари, маринци и пилоти учествуваат во поморската блокада на Ормутскиот теснец, поддржани од повеќе од десетина воени бродови и десетици авиони.
„Повеќе од 10.000 американски морнари, маринци и пилоти, заедно со повеќе од 12 воени бродови и стотина авиони, спроведуваат мисија за блокирање на бродовите што влегуваат и излегуваат од иранските пристаништа“, се вели во соопштението.
Како што истакнува CENTCOM, во текот на првите 24 часа, ниту еден брод не успеа да ја пробие блокадата, додека шест трговски бродови ги послушаа наредбите на американските сили и се вратија во иранските пристаништа во Оманскиот Залив.
Блокадата, тврдат тие, се спроведува непристрасно против бродовите на сите земји што влегуваат или излегуваат од иранските пристаништа и крајбрежните области, вклучувајќи ги и пристаништата во Персискиот Залив и Оман.
Во исто време, американските сили нагласуваат дека ја поддржуваат слободата на пловидба низ Ормускиот теснец за бродовите што се упатуваат кон пристаништа надвор од Иран.
Американската блокада на поморскиот сообраќај кон иранските пристаништа започна вчера во 10 часот наутро по источно време, односно во 16 часот по наше време, врз основа на одлуката на претседателот Доналд Трамп.
Овој потег доаѓа откако разговорите меѓу американските и иранските делегации во Исламабад пропаднаа за време на викендот. После тоа, Трамп објави „двојна блокада“ на Ормускиот теснец, низ кој Иран претходно го ограничи преминот на бродовите.
